आगामी निर्वाचन: बागलुङ–१ मा बहुपक्षीय भिडन्तको सम्भावना

२०८२ साल फाल्गुन १०

हाइस्पीड सम्वाददाता

बागलुङ क्षेत्र नम्बर १ मा चुनावी सरगर्मी बढ्दै, बहुदलीय प्रतिस्पर्धाको संकेत

बागलुङ क्षेत्र नम्बर १ मा आगामी निर्वाचन नजिकिँदै जाँदा चुनावी गतिविधि तीव्र बन्दै गएको छ। परम्परागत रूपमा ठूला राजनीतिक दलहरूको प्रभाव रहेको यस क्षेत्रमा यसपटक प्रतिस्पर्धा थप रोचक हुने संकेत देखिएको छ।

यस क्षेत्रमा राष्ट्रिय प्रजातन्त्र पार्टी (राप्रपा) का उम्मेदवार कल्याण विक्रम आचार्यसहित विभिन्न दलका उम्मेदवारहरू सक्रिय रूपमा चुनावी मैदानमा उत्रिएका छन्। आचार्यले भ्रष्टाचार नियन्त्रण, राजसंस्था तथा सनातन धर्म–संस्कृतिको संरक्षण र स्थानीय विकासलाई आफ्ना प्रमुख एजेन्डाका रूपमा प्रस्तुत गरेका छन्।

घरदैलो कार्यक्रम तथा मतदातासँगको प्रत्यक्ष संवादलाई तीव्रता दिँदै आएका उम्मेदवारहरूले आ–आफ्ना योजनाहरू सार्वजनिक गरिरहेका छन्। यस क्षेत्रमा राष्ट्रिय जनमोर्चा, नेपाली कांग्रेस, नेपाल कम्युनिष्ट पार्टी (एमाले) र राष्ट्रिय स्वतन्त्र पार्टीका उम्मेदवारहरूबीच पनि प्रतिस्पर्धा रहने अपेक्षा गरिएको छ।

राजनीतिक विश्लेषकहरूका अनुसार यसपटक बागलुङ–१ मा बहुदलीय प्रतिस्पर्धा हुने सम्भावना देखिएको छ। मतदाताको झुकाव र बदलिँदो राजनीतिक समीकरणका कारण निर्वाचन परिणाम रोचक बन्न सक्ने आकलन गरिएको छ।