रौतहटमा निर्वाचन सुरक्षा कडा, संयुक्त परिचालन तीव्र

आगामी फागुन २१ गते हुने प्रतिनिधि सभा सदस्य निर्वाचन २०८२ लाई स्वतन्त्र, निष्पक्ष र शान्तिपूर्ण रूपमा सम्पन्न गराउने उद्देश्यले रौतहटमा सुरक्षा व्यवस्था कडा पारिएको छ। जिल्लामा तैनाथ नेपाली सेनाको श्री नारायणदल गण ले व्यापक गस्ती तथा निगरानी अभियान सञ्चालन गरेको जनाएको छ।

संवेदनशील र अति संवेदनशील मतदान केन्द्रहरूमा विशेष निगरानी बढाइएको छ भने पैदल, मोटरसाइकल, सवारी तथा बख्तरबन्द गाडीमार्फत संयुक्त सुरक्षा परिचालन गरिएको छ। ग्रामीण क्षेत्रदेखि सदरमुकामसम्म सुरक्षा उपस्थिति सुदृढ पारिँदा सर्वसाधारणमा सुरक्षाको अनुभूति बढेको बताइएको छ।

गणले नेपाल प्रहरी र सशस्त्र प्रहरी बलसँग समन्वय गरी १७ वटै स्थानीय तहमा संयुक्त गस्ती, आकस्मिक चेकजाँच तथा शंकास्पद गतिविधिमाथि निगरानी बढाएको छ। निर्वाचन अवधिभर २४ सै घण्टा निगरानी प्रणाली सक्रिय रहने र मतदान केन्द्रको भीड व्यवस्थापन, मतदाता तथा निर्वाचन सामग्रीको सुरक्षामा विशेष ध्यान दिइने जनाइएको छ। आवश्यकता अनुसार द्रुत प्रतिक्रिया टोली तयारी अवस्थामा राखिएको छ।

प्रमुख जिल्ला अधिकारी दिनेश सागर भुसालले सबै सुरक्षा निकायबीच घनिष्ठ समन्वय भइरहेको उल्लेख गर्दै नागरिकलाई अफवाहमा नपरी शान्तिपूर्ण रूपमा मतदानमा सहभागी हुन आग्रह गरेका छन्। मतदानका दिन निषेधित क्षेत्र घोषणा गरी अनधिकृत भीड, जुलुस वा प्रदर्शन नियन्त्रण गरिने तयारी गरिएको छ।

खुला सीमा र विगतका निर्वाचन अनुभवलाई ध्यानमा राख्दै पूर्वतयारी स्वरूप सुरक्षा व्यवस्था मजबुत बनाइएको सुरक्षा विश्लेषकहरूको भनाइ छ। साथै सामाजिक सञ्जालमार्फत फैलिन सक्ने भ्रामक सूचना र उत्तेजनात्मक सामग्रीप्रति पनि सुरक्षा निकाय सतर्क रहेको जनाएको छ।

समग्रमा, सुरक्षा निकायहरूको कडा सतर्कता, संयुक्त परिचालन र पूर्वतयारीका कारण रौतहटमा प्रतिनिधि सभा सदस्य निर्वाचन २०८२ शान्तिपूर्ण र व्यवस्थित रूपमा सम्पन्न हुने विश्वास व्यक्त गरिएको छ।

श्रोत: प्रेमचन्द्र झा