देशका विभिन्न स्थानमा डुबेर तीन जनाको मृत्यु

देशका विभिन्न जिल्लामा डुबेर तीन जनाको मृत्यु भएको छ। नेपाल प्रहरीको केन्द्रीय समाचार कक्षका अनुसार सर्लाही, महोत्तरी र दाङमा छुट्टाछुट्टै घटनामा तीन जनाले ज्यान गुमाएका हुन्।

सर्लाहीको मलंगवा नगरपालिका–२ झण्डा बजार नजिकै रहेको पोखरीमा डुबेर पर्सा घर भई सोही स्थानमा डेरा गरी बस्ने बाल्मिकी पण्डितकी ४ वर्षीया छोरी संयुक्ता प्रजापतीको मृत्यु भएको प्रहरीले जनाएको छ। शुक्रबार बिहान डुबेर गम्भीर भएकी उनको प्रादेशिक अस्पताल मलंगवामा उपचारका क्रममा मृत्यु भएको हो।

यस्तै, महोत्तरीको लोहरपट्टी नगरपालिका–८ स्थित बिगही खोलामा डुबेर स्थानीय रजाबुल राईनका अन्दाजी १२ वर्षीय छोरा नौसाद राईनको शुक्रबार दिउँसो मृत्यु भएको छ। डुबेर अशक्त भएका उनलाई उपचारका लागि प्रादेशिक अस्पताल जनकपुर लगिएकोमा उपचारकै क्रममा ज्यान गएको हो।

त्यसैगरी, दाङको राजपुर गाउँपालिका–१ गुरुङखोलामा ६० वर्षीय पुने रोका मगरको नुहाउने क्रममा डुबेर शुक्रबार दिउँसो मृत्यु भएको प्रहरीले जनाएको छ।

घटनाका सम्बन्धमा प्रहरीले आवश्यक अनुसन्धान अघि बढाएको जनाएको छ।

श्रोत: अनलाईन खबर