जी–७ शिखर सम्मेलनको विरोधमा जेनेभामा विशाल प्रदर्शन, केही स्थानमा हिंसात्मक घटना

जी–७ शिखर सम्मेलनको विरोधमा जेनेभामा विशाल प्रदर्शन, केही स्थानमा हिंसात्मक घटना

फ्रान्सको एभियानमा बुधबार हुने जी–७ शिखर सम्मेलनको विरोधमा स्विट्जरल्यान्डको जेनेभामा आइतबार विशाल प्रदर्शन गरिएको छ। ‘नो जी–७ गठबन्धन’को नेतृत्वमा आयोजित प्रदर्शनमा विभिन्न समूह तथा संगठनहरूको सहभागिता रहेको थियो। प्रदर्शनकारीहरूले ‘जी–७ लाई अस्वीकार गरौँ’ लगायतका नारासहित र्‍याली निकालेका थिए।

प्रदर्शन प्रारम्भमा शान्तिपूर्ण रूपमा अघि बढे पनि पछि केही स्थानमा तनाव उत्पन्न भएको थियो। विस्फोटका आवाज सुनिनुका साथै कालो धुवाँ देखिएको र एक टेस्ला कारमा आगजनी गरिएको प्रत्यक्षदर्शीहरूले बताएका छन्।

जेनेभा प्रहरीले प्रदर्शन क्षेत्र नजिकबाट चक्कु, बञ्चरो, ग्यास क्यानिस्टर तथा पटाका जस्ता सामग्री बरामद गरेको जनाएको छ। घटनाका कारण शहरको सार्वजनिक यातायात सेवा प्रभावित भएको थियो भने केही ट्रलीबस सेवा निलम्बन र बस तथा ट्रामका रुट परिवर्तन गरिएको थियो।

फ्रान्सले अन्तर्राष्ट्रिय अस्थिरताबारे छलफल गर्न जी–७ बैठक आयोजना गरेको जनाएको छ। सम्मेलनमा बेलायत, क्यानडा, फ्रान्स, जर्मनी, इटाली, जापान, अमेरिका तथा युरोपेली संघका नेताहरू सहभागी हुनेछन्।

सुरक्षालाई ध्यानमा राख्दै स्विस अधिकारीहरूले करिब ४ हजार सैनिक परिचालन गरेका छन् भने फ्रान्ससँग जोडिएका अधिकांश सीमा नाकाहरू अस्थायी रूपमा बन्द गर्ने घोषणा गरेका छन्।