राजनीतिक पार्टीभित्रको स्वार्थको खोल

केही व्यक्तिहरूको विशेषता नै विश्वास जित्नु र त्यसैलाई तोड्नु रहेछ। अगाडि पर्दा मिठा कुरा, ठूलो आश्वासन र आत्मीय व्यवहार; तर व्यवहारमा भने झुट, भ्रम र स्वार्थ मात्र। यस्ता मानिसहरूलाई चिन्न समय लाग्छ, तर एकपटक चिनिसकेपछि उनीहरूको वास्तविक अनुहार स्पष्ट देखिन्छ।
आफूलाई इमानदार र सिद्धान्तवादी देखाउने, तर भित्रभित्रै अर्कै खेल खेल्ने प्रवृत्ति निकै खतरनाक हुन्छ। यस्ता मानिसहरू प्रत्यक्ष शत्रुभन्दा पनि बढी हानिकारक हुन्छन्, किनकि उनीहरू विश्वासको आवरणभित्र लुकेर काम गर्छन्।
पटक–पटक झुट बोल्ने, आश्वासन बाँड्ने, सम्बन्धलाई प्रयोग गर्ने र पछि जिम्मेवारीबाट भाग्ने बानीले अन्ततः व्यक्तिको वास्तविक चरित्र उजागर गरिहाल्छ। मुखले जति राम्रो कुरा गरे पनि व्यवहारले सत्य बोल्छ।
विश्वास कमाउन वर्षौं लाग्छ, तर झुट र दोहोरो चरित्रले त्यो एकै क्षणमा गुम्न सक्छ। त्यसैले अब शब्द होइन, कर्म हेर्ने समय आएको छ। समयले सबैको वास्तविक परिचय सार्वजनिक गरिदिन्छ।